Prathinidhi Online
Related Articles
പാലക്കാട്: തിരഞ്ഞെടുപ്പ് ഡ്യൂട്ടിയിലുള്ള സമ്മതിദായകര്ക്കുള്ള പോസ്റ്റല് ബാലറ്റ് വിതരണം നവംബര് 26 മുതല് ആരംഭിക്കും. പോളിങ് ഡ്യൂട്ടിയുള്ള സമ്മതിദായകരുടെ തപാല് വോട്ടിനുള്ള അപേക്ഷ സ്വീകരിക്കുന്നതിനുള്ള ക്രമീകരണം ഏര്പ്പെടുത്തണമെന്ന് ജില്ലാ തിരഞ്ഞെടുപ്പ് ഉദ്യോഗസ്ഥരോടും വരണാധികാരികളോടും തിരഞ്ഞെടുപ്പ് കമ്മീഷന് ആവശ്യപ്പെട്ടിട്ടുണ്ട്. തിരഞ്ഞെടുപ്പ് ഡ്യൂട്ടിക്ക് നിയോഗിക്കപ്പെട്ട ജീവനക്കാരുടെ ഡ്യൂട്ടി വ്യക്തമാക്കുകയും പ്രസ്തുത ജോലിയിലേക്ക് നിയോഗിച്ചും കൊണ്ടുള്ള ഉത്തരവ് ബന്ധപ്പെട്ടവര് യഥാസമയം പുറത്തിറക്കണമെന്നും കമ്മീഷന് നിര്ദേശിച്ചിട്ടുണ്ട്. ജില്ലാ തിരഞ്ഞെടുപ്പ് ഉദ്യോഗസ്ഥര്, ജില്ലാ പോലീസ് മേധാവികള്, വരണാകാരികള്, ഉപവരണാധികാരികള് എന്നിവര്ക്കാണ് ഇതിനുള്ള ചുമതല. ഈ ഉത്തരവിന്റെ പകര്പ്പു സഹിതം അപേക്ഷകള് നല്കിയാല് ഉദ്യോഗസ്ഥര്ക്കും പോസ്റ്റല് ബാലറ്റ് പേപ്പറുകള് നല്കാനും കമ്മീഷന് നിര്ദ്ദേശം നല്കിയിട്ടുണ്ട്. ത്രിതല പഞ്ചായത്തുകളെ സംബന്ധിച്ച് മൂന്ന് ബാലറ്റുകളും മുനിസിപ്പാലിറ്റി, കോര്പ്പറേഷന് എന്നിവയിലേയ്ക്ക് ഓരോ ബാലറ്റുമാണ് നല്കേണ്ടത്.
പോസ്റ്റല് ബാലറ്റ് ലഭിക്കാന് അര്ഹതയുള്ളവര്
- പോളിങ് സ്റ്റേഷനില് പോളിംഗ് ഡ്യൂട്ടിക്ക് നിയോഗിക്കപ്പെടുന്നവര്
- പോളിങ് ദിവസം തിരഞ്ഞെടുപ്പുമായി ബന്ധപ്പെട്ട മറ്റ് പ്രവര്ത്തനങ്ങളില് ഏര്പ്പെടുന്ന സംസ്ഥാന തിരഞ്ഞെടുപ്പ് കമ്മീഷനിലെ മുഴുവന് ജീവനക്കാര്ക്കും
- ജില്ലാ തിരഞ്ഞെടുപ്പ് ഓഫീസുകളിലെയും, പഞ്ചായത്ത്, മുനിസിപ്പാലിറ്റി, കോര്പ്പറേഷന് എന്നിവിടങ്ങളിലെയും ഇലക്ഷന് വിഭാഗം ജീവനക്കാര്
- വരണാധികാരി, ഉപവരണാധികാരി എന്നിവരുടെ ഓഫീസുകളിലെ ഇലക്ഷന് വിഭാഗം ജീവനക്കാര്
- ഒബ്സര്വര്മാര്
- സെക്ടറല് ഓഫീസര്മാര്
- ആന്റി ഡിഫെയ്സ്മെന്റ് സ്ക്വാഡിലെ ഉദ്യോഗസ്ഥര്
- തിരഞ്ഞെടുപ്പ് സുരക്ഷാ ചുമതലകളില് നിയോഗിക്കപ്പെടുന്ന പൊലീസ് ഉദ്യോഗസ്ഥര്
പോസ്റ്റല് ബാലറ്റിന് അപേക്ഷിക്കാം
- തിരഞ്ഞെടുപ്പ് ഡ്യൂട്ടിയിലുള്ള വോട്ടര്മാര് പോസ്റ്റല് ബാലറ്റിനായി ഫാറം 15 ല് ബന്ധപ്പെട്ട വരണാധികാരിക്ക് അപേക്ഷ നല്കണം. അപേക്ഷ ഫാറം വരണാധികാരിയുടെ ഓഫീസിലും സംസ്ഥാന തിരഞ്ഞെടുപ്പ് കമ്മീഷന് വെബ് സൈറ്റിലും (https://sec.kerala.gov.in/) ലഭിക്കും.
- അപേക്ഷ ബന്ധപ്പെട്ട വരണാധികാരികള്ക്ക് വോട്ടെടുപ്പിന് ഏറ്റവും കുറഞ്ഞത് 7 ദിവസം മുന്പോ, അല്ലെങ്കില് വരണാധികാരിക്ക് അനുവദിക്കാവുന്ന കുറഞ്ഞ കാലാവധിക്ക് മുന്പോ ലഭിക്കത്തക്കവിധം അയക്കുകയോ, നേരിട്ട് നല്കുകയോ ചെയ്യാം. നേരിട്ട് നല്കുമ്പോള് അപേക്ഷകന് സ്വന്തം ഐഡന്റിറ്റി വരണാധികാരിയെ ബോധ്യപ്പെടുത്തിയിരിക്കണം.
- ഗ്രാമ, ബ്ലോക്ക്, ജില്ലാ പഞ്ചായത്തുകളിലേക്ക് അതിന്റെ ഓരോ വരണാധികാരിക്കും പ്രത്യേകം അപേക്ഷകള് നല്കണം. മൂന്ന് അപേക്ഷകളും ഒരു കവറിലാക്കി നല്കിയാല് മതി. എല്ലാ തലത്തിലെയും പോസ്റ്റല് ബാലറ്റിനായി മൂന്ന് വരണാധികാരികള്ക്കുമുള്ള ഫാറം 15 ലെ മൂന്ന് അപേക്ഷകളും ഒരു കവറിലാക്കി ഏതെങ്കിലും ഒരു വരണാധികാരിക്ക് നല്കിയാലും മതി.
ത്രിതല പഞ്ചായത്തുകളിലേക്കുള്ള അപേക്ഷകള് ബ്ലോക്ക് പഞ്ചായത്ത് തലത്തില് ഒന്നിച്ചാണ് പരിഗണിക്കുന്നത്. ജില്ലാ പഞ്ചായത്തിന്റെ ബാലറ്റ് അയക്കുന്നത് ചുമതലപ്പെട്ട ബ്ലോക്ക് പഞ്ചായത്ത് വരണാധികാരിക്കാണ്. - ത്രിതല പഞ്ചായത്തുകളിലേക്കുള്ള പോസ്റ്റല് ബാലറ്റ് പേപ്പറുകള്, ഫാറം 16 ലെ സത്യപ്രസ്താവന (3 വീതം), ഫാറം 17 ലെ സമ്മതിദായകര്ക്കുള്ള നിര്ദ്ദേശങ്ങള് (1 വീതം), ഫാറം 18 ലെ ചെറിയ കവറുകള് (3 വീതം), ഫാറം 19 ലെ വലിയ കവറുകള് (3 വീതം) എന്നിവ ഒന്നിച്ച് ഒരു വലിയ കവറിലാക്കി അപേക്ഷകന് നേരിട്ടോ സ്പീഡ് പോസ്റ്റായോ നല്കും. മുനിസിപ്പാലിറ്റികളിലും കോര്പ്പറേഷനുകളിലും ഇവയെല്ലാം ഒന്നു വീതമാണ് നല്കുക. നേരിട്ട് കൈമാറുകയാണെങ്കില് അപേക്ഷകന് സ്വന്തം ഐഡന്റിറ്റി വരണാധികാരിയെ ബോധ്യപ്പെടുത്തണം.
