Prathinidhi Online
Related Articles
പാലക്കാട്: തുലാവര്ഷം തുടക്കത്തില് തന്നെ അതിശക്തമായതോടെ കേരളത്തില് 5 ദിവസം കനത്ത മഴക്ക് സാധ്യതയെന്ന് മുന്നറിയിപ്പ്. രാജ്യത്ത് നിന്ന് കാലവര്ഷം പൂര്ണമായും പിന്മാറിയതായി കാലാവസ്ഥ വകുപ്പ് വ്യക്തമാക്കി. അറബിക്കടലിലെ ചക്രവാതച്ചുഴി വൈകാതെ ന്യൂനമര്ദ്ദമായേക്കുമെന്നാണ് റിപ്പോര്ട്ടുകള്. ഇതോടെ തിരുവനന്തപുരം ഉള്പ്പെടെയുള്ള തെക്കന് ജില്ലകളില് ശക്തമായ മഴ തുടരുമെന്ന് കാലാവസ്ഥ നിരീക്ഷണ കേന്ദ്രം അറിയിച്ചു.
വ്യാഴാഴ്ച 2 ജില്ലകളില് ഓറഞ്ച് അലര്ട്ടും 7 ജില്ലകളില് യെല്ലോ അലര്ട്ടും പ്രഖ്യാപിച്ചിട്ടുണ്ട്. കോട്ടയം, ഇടുക്കി ജില്ലകളിലാണ് ഇന്ന് അതിശക്ത മഴ മുന്നറിയിപ്പുള്ളത്. 24 മണിക്കൂറില് 204.4 എം എം വരെ മഴ ലഭിക്കുമെന്നാണ് പ്രവചനം. തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം, തൃശൂര്, മലപ്പുറം ജില്ലകളിലാണ് ഇന്ന് യെല്ലോ അലര്ട്ട് പ്രഖ്യാപിച്ചിട്ടുള്ളത്. നാളെ എറണാകുളത്ത് ഓറഞ്ച് അലര്ട്ടും തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, തൃശൂര് ജില്ലകളില് യെല്ലോ അലര്ട്ടും പ്രഖ്യാപിച്ചിട്ടുണ്ട്.
വടക്കു കിഴക്കന് മണ്സൂണാണ് കേരളത്തിന്റെ തുലാവര്ഷം. സംസ്ഥാനത്തെ രണ്ടാമത്തെ മഴക്കാലമാണിത്. ഒക്ടോബര് മുതല് ഡിസംബര് വരെയാണ് തുലാവര്ഷം. കനത്ത മഴയും ഇടിമിന്നലും തുലാവര്ഷത്തിന്റെ പ്രത്യേകതയാണ്. വടക്കന് കേരളത്തെ അപേക്ഷിച്ച് തെക്കന് കേരളത്തിലാണ് തുലാമഴ കൂടുതലായി ലഭിക്കുക. പശ്ചിമഘട്ടം കടന്നു വരുന്ന മഴമേഘങ്ങളാണ് സംസ്ഥാനത്ത് തുലാവര്ഷം സമ്മാനിക്കുന്നത്.
