Prathinidhi Online
Related Articles
കൊച്ചി: ലുലുമാളിലെത്തുന്ന ഉപഭോക്താക്കളില് നിന്ന് പാര്ക്കിങ് ഫീസ് ഈടാക്കുന്നത് ശരിവച്ച് ഹൈക്കോടതി. പാര്ക്കിങ് ഫീസ് പിരിക്കുന്നത് നിയമാനുസൃതമാണെന്ന സിംഗിള് ബെഞ്ചിന്റെ ഉത്തരവ് ഡിവിഷന് ബെഞ്ച് ശരിവെക്കുകയായിരുന്നു. പാര്ക്കിങ് ഫീസ് ഈടാക്കുന്നത് കേരള മുനിസിപ്പാലിറ്റി ആക്ട്, കേരള ബില്ഡിങ് റൂള്സ് എന്നിവയുടെ ലംഘനമാണെന്നായിരുന്നു ഹരജിക്കാരുടെ വാദം. ഈ വാദത്തെ കോടതി തള്ളുകയും ഫീസ് ഈടാക്കണോ വേണ്ടയോ എന്ന് തീരുമാനിക്കാന് കെട്ടിട ഉടമയ്ക്ക് വിവേചനാധികാരമുണ്ടെന്ന് നിരീക്ഷിക്കുകയും ചെയ്തു.
മുനിസിപ്പാലിറ്റി, കോര്പറേഷന് ലൈസന്സ് പ്രകാരം കെട്ടിട ഉടമയ്ക്ക് പാര്ക്കിങ് ഫീസ് പിരിക്കാമെന്ന് നേരത്തേ സിംഗിള് ബെഞ്ച് വിധിച്ചിരുന്നു. ജസ്റ്റിസുമാരായ എസ്.എ ധര്മാധികാരി, വി.എം ശ്യാംകുമാര് എന്നിവരുടേതാണ് വിധി. ബോസ്കോ കളമശ്ശേരിയാണ് ഹരജി നല്കിയത്. പേ ആന്റ് പാര്ക്കിങ് ഉള്പ്പെടെയുള്ള സേവനങ്ങള്ക്ക് കമ്പനിക്ക് അനുമതി നല്കിയിട്ടുണ്ടെന്നും ഫീസ് ഈടാക്കുന്നത് നിയമവിരുദ്ധമല്ലെന്നുമാണ് കോടതി വിധിച്ചത്.
ഇടപ്പള്ളി ലുലുമാളില് ബേസ്മെന്റ്, മള്ട്ടിലെവല് കാര് പാര്ക്കിങ് എന്നിവിടങ്ങളിലായി വിശാലവും സുരക്ഷിതവുമായ സൗകര്യമാണ് വാഹനങ്ങള്ക്കായി ഒരുക്കിയിരിക്കുന്നത്. പാര്ക്കിങ് ഏരിയ കൂടി ഉള്പ്പെടുത്തിയാണ് മുനിസിപ്പാലിറ്റിക്ക് കെട്ടിട നികുതി നല്കുന്നതെന്നുമായിരുന്നു ലുലുമാള് അധികൃതര് കോടതിയില് വാദിച്ചത്. ഈ തുക പാര്ക്കിങ് ഏരിയയുടെ പരിപാലനത്തിനായാണ് ഉപയോഗിക്കുന്നതെന്നും കമ്പനി വാദിച്ചു. പാര്ക്കിങ് ഫീസ് പിരിക്കാന് ലുലുമാളിന് ലൈസന്സ് നല്കിയിട്ടുണ്ടെന്ന് നേരത്തേ കളമള്ളേരി നഗരസഭ ഹൈക്കോടതിയില് വ്യക്തമാക്കിയിരുന്നു.
