Prathinidhi Online
Related Articles
കൊല്ലം: കൊല്ലം കുരീപ്പുഴയില് കായലില് കെട്ടിയിട്ടിരുന്ന ബോട്ടുകളില് വന് അഗ്നിബാധ. നിരവധി ബോട്ടുകള് കത്തി നശിച്ചു. കായലില് കെട്ടിയിട്ടിരുന്ന ബോട്ടുകള്ക്കാണ് തീപിടിച്ചത്. പുലര്ച്ചെ രണ്ടരയോടെ കുരീപ്പുഴ പള്ളിക്ക് സമീപം അയ്യന്കോവിന് ക്ഷേത്രത്തിന് അടുത്താണ് സംഭവം. അഗ്നിബാധയുടെ കാരണം വ്യക്തമല്ല. ഫയര് ഫോഴ്സിന്റെ നിരവധി യൂണിറ്റുകള് സ്ഥലത്തെത്തി തീയണയ്ക്കല് തുടരുകയാണ്. സമീപത്തുണ്ടായിരുന്ന മറ്റ് ബോട്ടുകള് മാറ്റിയിട്ടുണ്ട്. തീ പടര്ന്നതിന് പിന്നാലെ ബോട്ടുകളില് ഉണ്ടായിരുന്ന ഗ്യാസ് സിലിണ്ടറുകള് പൊട്ടിത്തെറിച്ചിരുന്നു. ഇത് തീപിടിത്തത്തിന്റെ വ്യാപ്തി വര്ധിപ്പിച്ചുവെന്നാണ് അഗ്നിരക്ഷാസേനാ ഉദ്യോഗസ്ഥര് പറയുന്നത്.
കുളച്ചല്, പൂവാര് സ്വദേശികളുടെ ബോട്ടുകളാണ് കത്തിനശിച്ചതെന്നാണ് റിപ്പോര്ട്ടുകള്. കായലില് ഉണ്ടായിരുന്ന ചീന വലകള്ക്കും തീപിടിച്ചു. ട്രോളിംഗ് ബോട്ടുകള് അല്ലാത്ത ഒന്പത് ചെറിയ ബോട്ടുകളും ഒരു ഫൈബര് വള്ളവും കത്തി നശിച്ചിട്ടുണ്ട്. ആഴക്കടലില് പരമ്പരാഗത രീതിയില് മത്സ്യബന്ധനം നടത്തുന്ന ബോട്ടുകളാണിവ. സംഭവത്തില് ആര്ക്കും പരിക്കില്ലെന്നാണ് പ്രാഥമിക വിവരം.
നവംബര് മാസത്തിലും അഷ്ടമുടി കായലില് ബോട്ടുകള്ക്ക് തീ പിടിച്ചിരുന്നു. കുരീപ്പുഴ പാലത്തിന് സമീപത്ത് വച്ചായിരുന്നു ഈ അപകടം. അന്ന് അഗ്നിബാധയില് രണ്ട് മത്സ്യത്തൊഴിലാളികള്ക്ക് പരിക്കേറ്റിരുന്നു. ഐസ് പ്ലാന്റിന് മുന്നില് നങ്കൂരമിട്ടിരുന്ന രണ്ട് ബോട്ടുകള്ക്കാണ് തീ പിടിച്ചത്.
