Prathinidhi Online
Related Articles
പാലക്കാട്: കണ്ണമ്പ്ര, പന്തലാംപാടത്ത് പുതുതായി തുടങ്ങിയ കുടുംബശ്രീയുടെ പ്രീമിയം റെസ്റ്റോറന്റ് ‘കഫേ കുടുംബശ്രീ’ റസ്റ്റോറന്റ് തദ്ദേശ സ്വയംഭരണ, എക്സൈസ്, പാര്ലമെന്ററി കാര്യ വകുപ്പ് മന്ത്രി എം.ബി. രാജേഷ് ഉദ്ഘാടനം ചെയ്തു. കുടുംബശ്രീയുടെ മുഖമുദ്ര വിശ്വാസ്യതയാണെന്ന് റസ്റ്റോറന്റ് ഉദ്ഘാടനം ചെയ്യവേ മന്ത്രി പറഞ്ഞു. ജില്ലയുടെ മുഖച്ഛായ മാറ്റുന്ന കൊച്ചി-ബാംഗ്ലൂര് വ്യവസായ ഇടനാഴിയുടെ വരവ് പ്രദേശത്തിന് മുതല്ക്കൂട്ടാകുമെന്നും മന്ത്രി അഭിപ്രായപ്പെട്ടു. പദ്ധതി വഴി പതിനായിരം കോടി രൂപയുടെ നിക്ഷേപവും അത്രത്തോളം തൊഴിലവസരങ്ങളും പ്രദേശത്ത് ഉണ്ടാകും. ഇതൊരു മാനുഫാക്ചറിങ് ഹബ്ബായി കണക്കാക്കാമെന്നും, പ്രദേശത്തിന്റെ സാമ്പത്തിക, സാമൂഹിക വികാസത്തിന് ഇടനാഴി വലിയ പങ്ക് വഹിക്കുമെന്നും മന്ത്രി കൂട്ടിച്ചേര്ത്തു.
പരിപാടിയില് പി.പി സുമോദ് എം.എല്.എ അധ്യക്ഷനായി. ജില്ലാ പഞ്ചായത്ത് പ്രസിഡന്റ് കെ. ബിനുമോള് മുഖ്യാതിഥിയായി. ജില്ലാ പഞ്ചായത്ത് വൈസ് പ്രസിഡന്റ് സി.കെ ചാമുണ്ണി, കണ്ണമ്പ്ര ഗ്രാമപഞ്ചായത്ത് പ്രസിഡന്റ് സുമതി, വൈസ് പ്രസിഡന്റ് കെ.ആര് മുരളി, ജില്ലാ പഞ്ചായത്ത് ക്ഷേമകാര്യ സ്റ്റാന്ഡിങ് കമ്മിറ്റി ചെയര്പേഴ്സണ് അനിത പോള്സണ്, സ്റ്റാന്ഡിങ് കമ്മിറ്റി ചെയര്മാന്മാര്, വാര്ഡ് അംഗങ്ങള്, രാഷ്ട്രീയ പാര്ട്ടി പ്രതിനിധികള് എന്നിവര് പങ്കെടുത്തു.
