Prathinidhi Online
Related Articles
കോഴിക്കോട്: പ്രൈം വോളി കിരീടം വീണ്ടും സ്വന്തമാക്കാന് കാലിക്കറ്റ് ഹീറോസ് ഹൈദരാബാദിലേക്ക് വിമാനം കയറി. കഴിഞ്ഞ സീസണിലെ ചാംപ്യന്മാരായ കാലിക്കറ്റ് ഹീറോസ് ഇത്തവണയും കിരീടവുമായി തിരിച്ചെത്തുമെന്ന വാശിയിലാണ് ഹൈദരാബാദിലേക്ക് പറക്കുന്നത്.
പ്രൈംവോളിയുടെ നാലാംസീസണ് ഒക്ടോബര് രണ്ടിന് വൈകിട്ട് ഏഴിന് തുടക്കമാവുകയാണ്. ഹൈദരാബാദിലെ ഗച്ചിബൗളി ഇന്ഡോര് സ്റ്റേഡിയത്തില് നടക്കുന്ന ഉദ്ഘാടന മത്സരത്തില് കാലിക്കറ്റ് ഹീറോസ് ഹൈദരാബാദിനെയാണ് നേരിടുന്നത്.
എഷ്യന് ഗെയിംസില് ഇന്ത്യക്കുവണ്ടി നാലു തവണ കളത്തിലിറങ്ങിയ തമിഴ്നാട്ടുകാരനായ സെറ്റര് മോഹന് ഉഗ്രപാണ്ഡ്യനാണ് ഈ വര്ഷവും കാലിക്കറ്റിന്റെ നായകന്. ആഫ്രിക്കയില്നിന്നുള്ള അറ്റാക്കര് ഡെറ്റെ ബോസ്കോയും ശ്രീലങ്കയില്നിന്നുള്ള അറ്റാക്കര് തരുഷ ചമത്തുമാണ് ഇത്തവണ കാലിക്കറ്റിന്റെ തുരുപ്പു ചീട്ടുകള്. കഴിഞ്ഞ കിരീടനേട്ടത്തില് കാലിക്കറ്റിന്റെ കരുത്തായിരുന്ന ബ്ലോക്കര് വികാസ് മാനും യൂണിവേഴ്സല് അശോകും സിബറോ മുകേഷും ടീമിലുണ്ട്.
തമിഴ്നാട്ടില് നിന്നുള്ള അറ്റാക്കര് സന്തോഷ്, കര്ണാടക സ്വദേശി ഉസാമ റഹ്മത് എന്നിവര്ക്കു പുറമെ മലയാളി ദേശീയ താരങ്ങളായ ഷമീമുദ്ദീനും അബ്ദുള് റഹീമും ഹാരിസും കിരണ് രാജും ആദര്ശും അടക്കമുള്ള യുവതാരങ്ങളും ടീമിലുണ്ട്.
മുന് ഇന്ത്യന് ടീം പരിശീലകനായ സണ്ണി ജോസഫിനു കീഴില് ദേവഗിരി കോളജ് ഇന്ഡോര് സ്റ്റേഡിയത്തിലായിരുന്നു ടീമിന്റെ പരിശീലനം. അഹമ്മദ് ഫായിസ്, സാദിഖ് എന്നിവരാണ് അസിസ്റ്റന്റ് കോച്ചുമാര്.
