Prathinidhi Online
Related Articles
തിരുവനന്തപുരം: ബലാത്സംഗക്കേസില് രാഹുല് മാങ്കൂട്ടത്തില് എംഎല്എയുടെ മുന്കൂര് ജാമ്യാപേക്ഷ ഇന്ന് കോടതിയില്. തിരുവനന്തപുരം ജില്ലാ സെഷന്സ് കോടതിയാണ് കേസ് പരിഗണിക്കുന്നത്. പരാതി നല്കിയ യുവതിയുമായി ദീര്ഘകാലമായി സൗഹൃദമുണ്ടെന്നും പീഡനാരോപണം വാസ്തവ വിരുദ്ധമാണെന്നുമാണ് രാഹുല് പറയുന്നത്. ബലാത്സംഗം ചെയ്യുകയോ ഗര്ഭഛിദ്രത്തിന് നിര്ബന്ധിക്കുകയോ ചെയ്തിട്ടില്ലെന്നാണ് ഹര്ജിയില് പറയുന്നത്. കൂടാതെ യുവതിയുടെ ആരോപണങ്ങള് കെട്ടിച്ചമച്ചതാണെന്നും അന്വേഷണവുമായി സഹകരിക്കുമെന്നും ഹര്ജിയില് പറയുന്നു. പോലീസിന്റെ അതിവേഗ നീക്കത്തിന് പിന്നില് രാഷ്ട്രീയ നീക്കമുണ്ടെന്നും രാഹുലിന്റെ ഹര്ജിയിലുണ്ട്.
അതിനിടെ രാഹുല് മാങ്കൂട്ടത്തില് എംഎല്എക്കെതിരെ ബലാത്സംഗ പരാതിയുമായി ബംഗളൂരുവില് താമസിക്കുന്ന 23കാരിയായ യുവതി രംഗത്തെത്തിയിട്ടുണ്ട്. സുഹൃത്തിന്റെ വീട്ടില് വച്ച് പീഡിപ്പിച്ചെന്നും പീഡനത്തിന് പിന്നാലെ രാഹുല് ബന്ധത്തില് നിന്നും പിന്മാറിയെന്നുമാണ് പരാതിയില്. മുതിര്ന്ന കോണ്ഗ്രസ് നേതാവ് സോണിയ ഗാന്ധിക്കും കെപിസിസി പ്രസിസന്റിനും യുവതി പരാതി അയച്ചതായും റിപ്പോര്ട്ടുകളുണ്ട്. വര്ഷങ്ങള്ക്ക് മുമ്പ് നടന്ന സംഭവത്തിലാണ് പെണ്കുട്ടിയുടെ പരാതി. നേരത്തെ പെണ്കുട്ടിയില് നിന്ന് ക്രൈംബ്രാഞ്ച് വിവരം ശേഖരിച്ചിരുന്നു. എന്നാല് നിയമനടപടിക്ക് തയ്യാറല്ലെന്ന് പെണ്കുട്ടി അറിയിച്ചിരുന്നു.
അതേസമയം യുവതി പരാതി നല്കിയതിന് പിന്നാലെ ഒളിവില് പോയ രാഹുലിനെ ഇതുവരെ കണ്ടെത്താന് സാധിച്ചിട്ടില്ലെന്നാണ് പോലീസ് പറയുന്നത്. എംഎല്എയെ കണ്ടെത്താന് പോലീസ് അന്വേഷണം ഊര്ജ്ജിതമാക്കിയിട്ടുണ്ട്. കേസിന്റെ ഗൗരവവും യുവതിയുടെ മൊഴിയും കണക്കിലെടുത്ത് രാഹുലിന് മുന്കൂര്ജാമ്യം ലഭിക്കില്ലെന്നാണ് പോലീസിന്റെ കണക്കുകൂട്ടല്.
