Prathinidhi Online
Related Articles
തിരുവനന്തപുരം: സ്വര്ണക്കൊള്ള കേസില് ശബരിമല മുന് അഡിമിനിസ്ട്രേറ്റീവ് ഓഫീസര് മുരാരി ബാബു കസ്റ്റഡിയില്. ഇന്നലെ രാത്രി 10 മണിയോടെയാണ് പെരുന്നയിലെ വീട്ടില് വെച്ച് ബാബുവിനെ എസ്ഐടി കസ്റ്റഡിയിലെടുത്തത്. ചോദ്യം ചെയ്യല് പൂര്ത്തിയായതായാണ് വിവരം. ദ്വാരപാക ശില്പ പാളികളും കട്ടിളയും കടത്തിയ കേസുകളില് പ്രതി ചേര്ക്കപ്പെട്ടതോടെ മുരാരി ബാബു സസ്പെന്ഷനിലാണ്.
ആരോപണങ്ങളില് ദേവസ്വം ബോര്ഡ് ആദ്യം നടപടിയെടുത്ത ഉദ്യോഗസ്ഥനാണ് മുരാരി ബാബു. 2019 മുതല് 2024 വരെയുള്ള ഗൂഢാലോചനയിലെ പ്രധാന കണ്ണി മുരാരി ബാബുവാണെന്നാണ് കണ്ടെത്തല്. 2019 ല് മുരാരി ബാബു അഡ്മിനിസ്ട്രേറ്റീവ് ഓഫീസറായിരിക്കെയാണ് ദ്വാരപാലക ശില്പങ്ങളിലും കട്ടിള പാളികളിലും സ്വര്ണം പൊതിഞ്ഞത് എന്നതിന് പകരം ചെമ്പ് പൊതിഞ്ഞത് എന്ന് തിരുത്തിയത്. വ്യാജ രേഖ ചമച്ചതിന്റെ തുടക്കം മുരാരി ബാബുവിന്റെ കാലത്താണ് എന്നാണ് റിപ്പോര്ട്ട്. എന്നാല് ശബരിമലയിലെ സ്വര്ണക്കൊള്ളക്കേസില് പങ്കില്ലെന്നാണ് മുരാരി ബാബു ആവര്ത്തിച്ചിരുന്നത്. മഹസറില് ചെമ്പ് പാളിയെന്ന് രേഖപ്പെടുത്തിയത് തന്ത്രിയുടെ കത്തിന്റെ അടിസ്ഥാനത്തിലാണെന്ന് മുരാരി ബാബു പറഞ്ഞിരുന്നു.
