Prathinidhi Online
Related Articles
തിരുവനന്തപുരം: പാലക്കാട് അട്ടപ്പള്ളത്തെ ആള്ക്കൂട്ട കൊലപാതകത്തില് പ്രതിഷേധിച്ച് മുഖ്യമന്ത്രിക്ക് കത്തയച്ച് പ്രതിപക്ഷ നേതാവ് വി.ഡി സതീശന്. ക്രൂരമായ കൊലപാതകമാണ് ഉണ്ടായിരിക്കുന്നതെന്നും പ്രതികള്ക്ക് ശിക്ഷ ഉറപ്പാക്കണമെന്നുമാണ് പ്രതിപക്ഷ നേതാവിന്റെ കത്തില്.
പ്രതിപക്ഷ നേതാവിന്റെ കത്തിന്റെ പൂര്ണരൂപം
കേരളത്തില് ആവര്ത്തിക്കില്ലെന്നു നാം കരുതിയ ആള്ക്കൂട്ട കൊലപാതകം വീണ്ടും ഉണ്ടായിരിക്കുകയാണ്. അതും മധുവിന് ജീവന് നഷ്ടമായ അട്ടപ്പാടിയില് നിന്നും ഏറെ അകലെയല്ലാത്ത അട്ടപ്പള്ളത്ത്. മോഷ്ടാവെന്ന് ആരോപിച്ചാണ് അതിഥി തൊഴിലാളിയായ ഛത്തീസ്ഗഡ് ബിലാസ്പൂര് സ്വദേശി രാം നാരായണിനെ ഒരു സംഘം ആള്ക്കൂട്ട വിചാരണയ്ക്ക് വിധേയനാക്കി ക്രൂരമായി മര്ദ്ദിച്ചത്. നാലു മണിക്കൂറിനു ശേഷം പോലീസെത്തിയാണ് രാം നാരായണിനെ ആശുപത്രിയിലെത്തിച്ചത്. പക്ഷേ ജീവന് രക്ഷിക്കാനായില്ല.
കേരളത്തിനാകെ നാണക്കേടുണ്ടാക്കിയ ക്രൂരമായ ആള്ക്കൂട്ട കൊലപാതകമാണ് അട്ടപ്പള്ളത്ത് ഉണ്ടായത് എന്നതില് സംശയമില്ല. ആള്ക്കൂട്ടം നിയമം കയ്യിലെടുക്കുന്നത് അംഗീകരിക്കാനാകില്ല. അത് പരിഷ്കൃത സമൂഹത്തിന് യോജിച്ചതുമല്ല. കൊലപാതകത്തിന് ഉത്തരവാദികളായവര്ക്ക് ശിക്ഷ ഉറപ്പാക്കണം. കേരളത്തിന് അപമാനമുണ്ടാക്കിയ ആള്ക്കൂട്ട വിചാരണയ്ക്ക് ഇരയായി ജീവന് നഷ്ടമായ രാം നാരായണന് നീതി ഉറപ്പാക്കണം. രാം നാരായണിന്റെ കുടുംബത്തെ സാമ്പത്തികമായി സഹായിക്കാനും സര്ക്കാര് അടിയന്തിര നടപടി സ്വീകരിക്കണം.
