Prathinidhi Online
Related Articles
പാലക്കാട്: തദ്ദേശസ്ഥാപനങ്ങളിലേയ്ക്കുള്ള പൊതുതിരഞ്ഞെടുപ്പിനുള്ള വോട്ടര്പട്ടികയില് ഇന്നും നാളെയും (നവംബര് 4,5) തീയതികളില് പേര് ചേര്ക്കാനാകുമെന്ന് സംസ്ഥാന തിരഞ്ഞെടുപ്പ് കമ്മീഷണര് എ.ഷാജഹാന്. 2025 ഒക്ടോബര് 25 ന് പ്രസിദ്ധീകരിച്ച അന്തിമ വോട്ടര്പട്ടികയില് ഉള്പ്പെട്ടിട്ടില്ലാത്ത അര്ഹരായവര്ക്ക് പട്ടികയില് പേര് ചേര്ക്കുന്നതിനാണ് അവസരമുള്ളത്. മട്ടന്നൂര് ഒഴികെയുള്ള പ്രദേശങ്ങളിലെ വോട്ടര്മാര്ക്കാണ് ഈ അവസരമുള്ളതെന്ന് തിരഞ്ഞെടുപ്പ് കമ്മീഷ്ണര് അറിയിച്ചു. അനര്ഹരെ ഒഴിവാക്കുന്നതിനും, നിലവിലുള്ളവയില് ഭേദഗതി വരുത്തുന്നതിനും, സ്ഥാനമാറ്റം വരുത്തുന്നതിനും ഈ ദിവസങ്ങളില് അപേക്ഷിക്കാം. പ്രവാസികള്ക്കും പട്ടികയില് പേര് ചേര്ക്കാന് അപേക്ഷിക്കാവുന്നതാണ്.
ഇലക്ടറല് രജിസ്ട്രേഷന് ഓഫീസര്മാര് തുടര്നടപടി സ്വീകരിച്ച് സപ്ലിമെന്ററി പട്ടികകള് നവംബര് 14 ന് പ്രസിദ്ധീകരിക്കും. പട്ടികയുടെ പകര്പ്പുകള് അംഗീകൃത രാഷ്ട്രീയ പാര്ട്ടികള്ക്ക് നല്കും. 1994-ലെ കേരള പഞ്ചായത്ത് രാജ് ആക്ടിലെ 23, 24 വകുപ്പുകള് പ്രകാരവും, കേരള മുനിസിപ്പാലിറ്റി ആക്ടിലെ 79, 80 വകുപ്പുകള് പ്രകാരമാണ് ഈ അവസരം നല്കുന്നത്. 2025 ജനുവരി ഒന്നിനോ അതിന് മുന്പോ 18 വയസ്സ് പൂര്ത്തിയായവര്ക്ക് വോട്ടര്പട്ടികയില് പേര് ചേര്ക്കാം.
വോട്ടര്പട്ടികയില് പുതുതായി പേരു ചേര്ക്കുന്നതിനും (ഫോം 4), തിരുത്തലുകള് വരുത്തുന്നതിന് (ഫോം 6), സ്ഥാനമാറ്റം വരുത്തുന്നതിന് (ഫോം 7), പ്രവാസി വോട്ടര്പട്ടികയില് പേരു ചേര്ക്കുന്നതിന് (ഫോം 4 എ) എന്നിവ വഴി സംസ്ഥാന തിരഞ്ഞെടുപ്പ് കമ്മീഷന്റെ https://sec.kerala.gov.in വെബ് സൈറ്റില് ഓണ്ലൈനായി അപേക്ഷിക്കണം. ഓണ്ലൈനായി അപേക്ഷിക്കുമ്പോള് ഹിയറങ്ങിനുള്ള കമ്പ്യൂട്ടര് ജനറേറ്റഡ് നോട്ടീസ് ലഭിക്കും. നോട്ടീസില് പറഞ്ഞിട്ടുള്ള തീയതിയില് ആവശ്യമായ രേഖകള് സഹിതം ഹീയറിങ്ങിന് നേരിട്ട് ഹാജരാകണം. പേരൊഴിവാക്കുന്നതിനും അപേക്ഷിക്കാവുന്നതാണ്.
